आज भदौ १६ अर्थात वैदेशिक रोजगारीको कालो दिन

धनगढी खबर    

आज भदौ १६ अर्थात वैदेशिक रोजगारीको कालो दिन

काठमाडौं– वैदेशिक रोजगारीका लागि इराक पुगेका १२ जना नेपालीको हत्या भएको आज १५ वर्ष पुगेको छ । २०६१ साल भदौ १६ गते अर्थात् आजकै दिन वैदेरशिक रोजगारीका लागि इराक पुगेका १२ जना नेपाली मारिएका थिए ।

सुन्नी अतिवादी संगठन इस्लाम अल सुन्ना समूहले १२ जना नेपालीको विभत्स हत्या गरेको थियो । वैदेशिक रोजगारीका लागि कुवेत भनेर उनीहरुलाई इराक पुर्‍याइएको थियो ।

इराकमा १२ नेपालीको हत्यापछि नेपाली र मृतकका आफन्तले राजधानीमा रहेका म्यानपावर कम्पनीमा आक्रमण गरेका थिए । १२ जना नेपालीको हत्या भएपछि सरकारले वैदेशिक रोजगारीमा नेपाली कामदारलाई इराक जान रोक लगाएको छ ।

अमेरिकी सेन्ट्रल कमान्डले ५ वर्षअघि आफ्ना नागरिकलाई प्रतिवन्ध लगाएका देशका कामदार फिर्ता गर्न सवै देशलाई पत्राचार गरेपछि त्यहाँ कार्यरत श्रमिकलाई नेपाल सरकारले अनुमति दिएको थियो । तर, रोजगारीमा जान भने फुकुवा गरेको छैन । प्रतिबन्धित इराकमा अहिले पनि धेरै नेपाली कामदार रोजगारीका लागि जाने गरेका छन् ।

२०६१ साल भदौ १६ गतेको सम्झनामा वैदेशिक रोजगारीमो भदौ १६ गते अथवा आजको दिनलाई वैदेशिक रोजगारी क्षेत्रले ‘कालो दिन’ मान्ने गरेको छ ।

नेपाल सरकारले इराक जान लगाएको प्रतिवबन्ध अहिलेसम्म फुकुवा गरेको छैन । तर, वैदेशिक रोजगारीमा नेपाली श्रमिकहरु इराक जाने क्रम भने रोकिएका छैन । सरकारले प्रतिबन्ध लगाए पनि गैरकानुनी बाटो हुँदै इराक जाने कामदारको संख्या धेरै छ ।

भारत हुँदै अथवा खाडीका अन्य देश भनेर नेपाली श्रमिकलाई इराक रोजगारमा लगिन्छ । इराकमा करिब ५० हजारभन्दा धेरै नेपाली कार्यरत रहेको सरकारी अनुमान छ ।

भारत हुँदै वार्षिक ५ हजारभन्दा धेरै नेपाली इराक रोजगारीमा जाने गरेको सरकारी अनुमान छ । नेपाली कामदारहरु दलाल र म्यानपावर कम्पनीमार्फत नै रोजगारीका लागि इराक जाने गरेका छन् । धेरैजसो नेपाली महिलाहरु घरेलु कामदारका रुपमा इराक पुग्ने गरेका छन् ।

इराक घरेलु काममा वार्षिक रुपमा ठुलो संख्यामा महिला कामदार अवैध बाटो भएर लगिरहेको माइती नेपालकी कानूनी सल्लाहकार उमा तामाङ बताउँछिन् ।

पछिल्लो समय रोजगारीका लागि कुवेत, बहराइन, साउदी र कतार लैजाने भन्दै नेपाली श्रमिकहरुलाई इराक पुर्‍याउन गरिएको छ ।

दलाल मार्फत इराक पुगेर अलपत्र परेका नेपालीको सरकारले उद्दार गर्दै आएको छ । तर, कामदार कसरी इराक पुगे भने विषयमा भने सरकारले कुनै अनुसन्धान गर्दैन ।



सोमबार १६, भदौ २०७६ ११:५६ मा प्रकाशित

Loading...

प्रतिकृया दिनुहोस