निर्मला प्रकरण पहिलो होइन, भोलि पनि रहन्छ : गृहमन्त्री

धनगढी खबर    

निर्मला प्रकरण पहिलो होइन, भोलि पनि रहन्छ : गृहमन्त्री

गृहमन्त्री रामबहादुर थापा बादलले निर्मला पन्त प्रकरणको राजनीतिक भएको भन्दै असन्तुष्टि जनाएका छन् । गृह जोडिएको छ, अपराधीहरुलाई बचाउन खोज्यो भन्नु दुःखद भएको उनले बताए ।

मंगलबार मन्त्रालयमा आयोजित पत्रकार सम्मेलनमा गृहमन्त्री थापाले निर्मला पन्तको बलात्कारपछि हत्याको घटना जघन्य अपराध भएको बताए । तर यस्ता घटनालाई पूर्णरुपमा रोक्न नसक्ने भन्दै उनले भने, ‘यस किसिमका अपराध नयाँ र पहिलो होइन । निर्मला प्रकरणहरु यसभन्दा अगाडि पनि थिए, आज पनि छ र भोलि पनि केही समयसम्म रहन्छ।

यस किसिमको अपराधलाई पूर्ण रुपमा निषेध गर्न हामी सक्दैनौं ।’उनले निर्मला प्रकरणको राजनीतिकरण भएको बताए । ‘यो घटनामा गृह नै जोडिएको छ, अपराधीलाई बचाउन खोजिएको छ भनेर राजनीतिकरण गर्नु दुःखद हो’ उनले प्रतिप्रश्न गरे, ‘के साच्चै गृहले छुटाउन खोजेकै हो त ?’

उनले यस्ता घटनामा ९५ प्रतिशत र समग्र अपराधमा संलग्नलाई पक्राउ गरी कारबाही गर्न नेपाल प्रहरी ९७ प्रतिशत सफल भएको तथ्यांक प्रस्तुत गरे । केही घटनामा सफलता हात पार्न नसकिएको र विगतका सरकारका पालामा भएका घटनामा पनि यस्तो हुने गरेको भन्दै गृहमन्त्री थापाले भने, ‘यस्तो अरु देशमा पनि हुन्छ । अमेरिकामा पनि हुन्छ ।’

यद्यपि निर्मला प्रकरण र यस्ता अपराधिक घटनामा संलग्नहरुलाई कानुनी कठघरामा ल्याउन सरकार प्रतिवद्ध रहेको गृहमन्त्री थापाले बताएका छन् ।



मङ्गलबार ०७, साउन २०७६ १२:५३ मा प्रकाशित

Loading...

प्रतिकृया दिनुहोस