एसियाली क्षेत्रको विश्वकप छनौट प्रतियोगिता अन्तर्गत आज भएको खेलमा आयोजक सिंगापुरले कतारलाई ३३ रनले हराएको छ । ब्याटिङमा बलियो प्रदर्शन गरेका सिंगापुरका खेलाडीले बलिङमा पनि कसिलो प्रदर्शन गरेपछि जित हात पार्दै प्रतियोगितामा शानदार सुरुवात गरेको छ ।
टस जितेर पहिले ब्याटिङ गरेको सिंगापुरले निर्धारित २० ओभरमा ७ विकेट गुमाउँदै १ सय ८६ रन बनाएको थियो । टोलीका लागि सुरुवाती चार ब्याटसम्यानले अब्बल ब्याटिङ गरेपछि सिंगापुरले ठुलो स्कोर बनाउन सकेको थियो ।
ओपनर रोहन रंगराजनले टोलीका लागि २० बलमा ३ चौका र २ छक्का सहित ३२ रन बनाए भने अर्का ओपनर सुरेन्द्रन चन्द्रमोहनले ३९ बलमा ४७ रन बनाए ।
त्यस्तै तेश्रो नम्बरमा ब्याटसम्यान टिमोथी डेबिडले ३८ रन बनाए भने विकेट किपर ब्याटसम्यान मनप्रित सिंहले १८ बलमा ३४ रन बनाएका छन् ।
बलिङतर्फ कतारका इकवाल हसनले ४ विकेट लिएभने नौमान सरवारले २ विकेट लिए । जवाफी ब्याटिङ गरेको आक्रामक रुपमा खेलेपनी सिंगापुरको कसिलो बलिङको घेरा तोड्दै खेल जित्न सकेन । कतारले २० ओभरमा ९ विकेट गुमाउँदै १ सय ५३ रन मात्र बनाउन सक्यो ।
कतारको लागि कप्तान तमुर सज्जादले २९ बलमा २ चौका र २ छक्का सहित सर्वाधिक ३४ रन बनाए भने मोहम्मद रिजलानले नटआउट ३३ रन बनाए । त्यस्तै फैसल जावेदले २९ र मुहम्मद तनवीरले २६ रन बनाए ।
कसिलो बलिङ गरेको सिंगापुरका जनक प्रकाशले ४ ओभरमा १ मेडन सहित १५ रन दिइ ३ विकेट लिए । त्यस्तै अमजद महमुदले पनि ३ विकेट हात पारे ।
उत्कृष्ट बलिङ गरेका जनक नै प्लेयर अफ द म्याच चुनिए । नेपालले आफ्नो पहिलो खेल भोली खेल्दैछ । आज पराजित कतार नै नेपालको पहिलो प्रतिद्वन्दी रहेको छ । खेल नेपाली समयअनुसार बिहान ७ः१५ मा सुरु हुने तालिका रहेको छ ।