अमेरिकाको तलाउमा ६० वर्षअघि हराएको औंठी फेला

एजेन्सी    

अमेरिकाको तलाउमा ६० वर्षअघि हराएको औंठी फेला

अमेरिकाको म्यासाचुसेट्समा बस्ने एक दम्पतीले ६० वर्षअघि हराएको औंठी भेटिने कुरा सपनामा पनि चिताएका थिएनन् होला ।

बोस्टनमा बस्ने एक स्कुबा डाइभर लुक बेरुब मेटल डिटेक्टर लिएर तलाउ र समुद्रको गहिराइमा पुग्ने गरेका छन् । त्यहाँ गएर उनी बहुमूल्य धातुहरू खोज्छन् । 

बेरुबले स्कुबा डाइभिङका लागि शहरको ह्यान्सनस्थित तलाउमा पस्दा सन् १९६० को एक औंठी फेला पारे । बेरुबका अनुसार, सुनको औंठीमा अघिल्तिर शहरको एक विद्यालयको नाम छापिएको थियो । अनि डब्ल्यूजेडब्ल्यू अक्षर खोपिएको थियो । 

बेरुब घर फर्केपछि स्कूलका बारेमा खोजियो । औंठीमा पहिचान खुल्ने अक्षर भएकाले सही मालिकसम्म औंठी पुर्‍याउन चाहन्थे उनी । 

गेट अफ हेभन स्कूलहरूको पूर्व छात्रहरूको एक फेसबूक पेज जोइन गरेर उनले औंठीको कुरा झिके । बोस्टनमा बस्ने विलियम जोसेफ वेडलकी छोरी क्रिस्टिनले पोस्ट देखिन् र औंठीको तस्वीर पितालाई देखाइन् । ७७ वर्षीय जोसेफले देख्नेबित्तिकै औंठी चिने । 

क्रिस्टिनका अनुसार, उनले औंठी चिनेपछि बेरुबसँग सम्पर्क गरिन् । पिता जोसेफले आफ्नी प्रेमिकालाई औंठी दिएको र उनले त्यो हराएको उनले बताइन् । त्यसपछि बेरुबले जोसेफलाई औंठी सुम्पिए । 

बेरुब विगत १२ वर्षदेखि डाइभिङ गरिरहेका छन् । मेटल डिटेक्टर लिएर भने उनले चार वर्षअघि मात्र डाइभिङ गर्न थालेका हुन् । 

उनले १०० वटा औंठी जम्मा पारिसकेका छन् । धेरैजसो औंठीका मालिक पत्ता नलागेकाले फर्काउन नसकिएको उनी बताउँछन् । 



आइतबार ०८, असार २०७६ १२:५३ मा प्रकाशित

Loading...

प्रतिकृया दिनुहोस