काठमाडौं । मकवानपुरको मनहरी गाउँपालिका–६, रुपाचुरीस्थित एक विवाहमा गएका युवाबीच ‘ग्याङ फाइट’ भएको छ । बुधबार राति दुई पक्षबीच कुटपिट हुँदा विवाहका गएका दुई युवक घाइते भएका छन् । घाइतेमध्ये एकजनाको अवस्था गम्भीर छ ।
मनहरी गाउँपालिकाकै उज्वल थिङ र रोनिस लामा घाइते भएका जिल्ला प्रहरी कार्यालय मकवानपुरका डीएसपी लक्ष्मी भण्डारीले जानकारी दिइन् ।
थिङको अवस्था गम्भीर छ । उपचारका निम्ति उनलाई चितवनको भरतपुर मेडिकल कलेजमा पठाइएको प्रहरीले जनाएको छ ।
रुपाचुरीका सरोज प्रजाको विवाहमा गएका युवाबीच झगडा भएको थियो । रुपाचुरीकै इमान घलान, मनिक घलानसहितको युवाको समूहले उनीहरूमाथि कुटपिट गरेका थिए । कुटपिटमा संलग्न दुईजनालाई प्रहरीले नियन्त्रणमा लिएको छ ।