नवलपरासी । पश्चिम नवलपरासीमा अज्ञात समूहको गोली प्रहारबाट एक व्यवसायी घाइते भएका छन् ।
बर्दघाट नगरपालिका १६ केराबारी नजिकै अज्ञात समूहले गोली प्रहार गर्दा ६५ वर्षका गजेन्द्र विश्वकर्मा घाइते भएको प्रहरीले जनाएको छ ।
सुस्ता गाउँपालिका-१ बरुवामा सुनचाँदी पसल गर्ने विश्वकर्मालाई घर फर्कने क्रममा शनिबार राति गोली प्रहार भएको जिल्ला प्रहरी कार्यालय पश्चिम नवलपरासीका सूचना अधिकारी डिएसपी रेसम बोहराले जानकारी दिए ।
पाखुरामा गोली लागेर घाइते भएका विश्वकर्मालाई तत्काल चिसापानी अस्पताल बर्दघाट लगिए पनि उपचार सम्भव नभएपछि बुटवलस्थित तिनाउ अस्पताल रिफर गरिएको थियो ।
गोली लागेको र गोली प्रहार गर्ने व्यक्तिको खोजी कार्य भइरहेको डिएसपी बोहराले बताए । घाइते विश्वकर्माले प्रयोग गर्ने स्कुटरसमेत गोली प्रहार गर्ने समूहले लिएर फरार भएका छन् ।