धनगढी । दक्षिणी इजरायलमा हमासले गरेको आक्रमणमा परी ज्यान गुमाएकामध्ये थप दुई नेपालीको शव पहिचान भएको छ ।
दक्षिणी इजरायलमा ७ अक्टोबरमा भएको आक्रमणमा परी १० नेपाली विद्यार्थीको मृत्यु भएको थियो । मधुवन–१ सुनसरीका राजेशकुमार स्वर्णकार र सपही –६ धनुषाका अनन्द साहको शव पहिचान भएको हो ।
दुबैको शव पहिचान भएको तेल अबिबस्थित नेपाली दूताबासले जनाएको छ । यस अघि आइतबार तीन नेपाली विद्यार्थीको शव पहिचान भएको थियो । ज्यान गुमाएका डोटी पचनाली–३ का राजन फुलारा, डोटी लामीखाल– ८ का पदम थापा र सल्यान शारदा–३ का प्रवेश भण्डारीको शव आइतबार पहिचान भएको हो ।
बझाङ जयपृथ्वी– ६ का गणेशकुमार नेपाली, दार्चुला मालिकार्जुन– ४ का लोकेन्द्रसिंह धामी, दार्चुला लेकम–५ का दीपेशराज विष्ट, कैलाली घोडाघोडी–४ का नारायणप्रसाद न्यौपाने र कैलाली बौनियाँ–३ का आशिष चौधरीको शव नेपाल ल्याइसकिएको छ । यस अघि इजरायलमा हमासको आक्रमणमा परी मृत्यु भएका १० विद्यार्थीमध्ये ५ जनाको शव आफन्तको जिम्मा लगाइसकिएको छ ।
चार जनाको शव गत आइतबार आफन्तको जिम्मा लगाइएको थियो भने यसै गरी बझाङ जयपृथ्वी– ६ का गणेशकुमार नेपालीको शव भने बिहीबार राति मात्र धनगढी पुगेसँगै शव आफन्तको जिम्मा लगाइएको थियो । हमास आक्रमणबाट मारिएकामध्ये सात जना सुदूरपश्चिमका हुुन् ।
दूतावासका अनुसार हमासको आक्रमणमा परी घाइते भएका चार जना विद्यार्थीमध्ये दुई जना अस्पतालबाट डिस्चार्ज भएका छन्। डिस्चार्ज गरिएमध्ये एक जना नेपाल आइसकेका र अर्का एक जना दूतावासको रेखदेखमा छन् । अन्य दुई जना घाइतेको भने इजरायलमै उपचार भइरहेको दूतावासले जनाएको छ । सोही आक्रमणमा परेका कञ्चनपुर भीमदत्त–३ का विपिन जोशी अझै सम्पर्कविहीन छन् ।
सुदूरपश्चिम विश्वविद्यालयको कृषि क्षेत्रमा ‘लर्न एन्ड अर्न’ कार्यक्रमअन्तर्गत उनीहरू इजरायल गएका थिए ।