एक वर्ष जेल जीवन विताएर गत फागुन १५ गते रिहा भएका अभिनेता पल शाह यतिबेला म्यूजिक भिडियोमा मात्र काम गरिरहेका छन् । उनलाई फिल्म प्रस्ताव पनि राम्रै पुगिरेहको छ । तर, जेलबाट छुटेपछि उनले कुनै फिल्म सम्झौता गरेका छैनन् । एउटा टिमसँग भने उनको सहकार्यको सम्भावना प्रवल छ । त्यो टिम हो, ‘प्रकाश’ फेम्ड निर्देशक दिनेश राउत र लेखक विकास सुवेदी ।
दिनेश र पलबीच सहकार्य गराउन विकासले मध्यस्थकर्ताको भूमिका खेलिरहेका छन् । उनी आफैंले स्क्रिप्ट पनि लेखिरहेका छन् । विकास पलका लागि आफूले फिल्मको स्क्रिप्ट लेखिरहेको बताउँछन् । ‘उसका लागि दुईवटा स्क्रिप्टमा काम भैराखेको छ । पलको यो वर्ष दुईवटा फिल्म आउँछ । र, दुईटै हाम्रै टिमको प्रोजेक्ट हुन्छ । दुवै प्रोजेक्ट दिनेश राउत दाईसँग नै हुन्छ होला,’ उनले भने ।
ती फिल्ममा पल फरक हिसाबमा प्रस्तुत हुने सुवेदीको भनाई छ । ‘पलले यसअघि जस्तो फिल्म गरिरहेको थियो, अब त्यो हाइवेमा ऊ हुँदैन । यी प्रोजेक्टपछि उसमा ग्रोथ देखिन्छ । अब हतारमा काम गरेर करिअर अगाडि बढाउनु हुन्न भनेर उसलाई मैले ‘गाइड’ गरिरहेको छु,’ विकास भन्छन्, ‘फिल्म गर्नु ठूलो कुरा भएन तर आउँदाखेरि स्मरणीय कन्टेन्ट आउनुपर्छ । त्यसमा पल गम्भीर छ ।’
निर्देशक राउतले पनि पलसँग फिल्ममा सहकार्य हुनसक्ने संकेत गरे । उनले भने, ‘पलसँग सामान्य कुराकानी त भैराखेको छ तर, फाइनल भैसकेको छैन । मेरो पाइपलाइनमा पनि केही फिल्म छन् । पल र विकासको कुरा चाहिँ मलाई गराउने नै हो । अब मेरो समय के हुन्छ भन्ने कुरा हो ।’ निर्देशक राउत आगामी दशैंमा रिलिज गर्ने गरी एउटा लभस्टोरी फिल्म निर्देशनको तयारीमा छन् ।