एक वर्षको कारागार बसाइबाट रिहा भएपछि अभिनेता पल शाहले थुप्रै म्युजिक भिडियोमा अभिनय गरिसकेका छन् ।
उनको कमब्याक म्युजिक भिडियो ‘तिमीलाई हेर्ने बानी पर्यो’को फिमेल भर्सनले युट्युबमा राम्रो भ्युज पाइरहेको छ । यसैक्रममा उनको अभिनय रहेको नयाँ म्युजिक भिडियो शनिवार एक कार्यक्रमकाबीच सार्वजनिक गरिएको छ ।
केन्द्र मोशन पिक्चर्सको प्रस्तुतिमा ‘आँशु बनि नखस कैले नि’बोलको युगल गीतको भिडियो सार्वजनिक गरिएको हो ।
यो प्रेमगीतको भिडियोमा पल कमब्याक म्युजिक भिडियोकै जोडी सनिशा भट्टराईसँग प्रस्तुत छन् ।
यो गीतमा ऋषि खड्का र अनु चौधरीले स्वर दिएका छन् । शब्द एवं संगीत गायक खड्काकै छ भने केशव बडु गीतका एरेन्जर हुन् ।
शान थापाको निर्देशन, राजीव समरको निर्देशन रहेको भिडियोमा पल र सनिशाको केमेष्ट्रि गज्जबको देखिएको छ । मनोरम दृश्यहरुमा अर्जुन तिवारीले छायाँकन गरेको भिडियोलाई सुप्रिम पराजुलीले सम्पादन गरेका हुन् ।
केन्द्र मोशन पिक्चर्सको अफिसियल युट्युब च्यानलबाट भिडियो सार्वजनिक गरिएको हो । केन्द्र मोशनले लामो समयपछि म्युजिक भिडियो निर्माण गरेको हो ।