सुर्खेत। कालीकोटमा बलात्कार आरोपमा लागेको एक जनालाई पक्राउ गर्न गर्न गएका प्रहरी गाउँलेबाट कुटिएका छन् । बलात्कारको आरोपमा फरार रहेका एक अभियुक्तलाई पक्राउ गर्न जाँदा गाउँलेले प्रहरी र पीडित परिवारमाथि आक्रमण गरेका हुन् ।
बलात्कार आरोप लागेका पलाँता गाउँपालिका–६ सैनका ३१ वर्षीय संकल्प बुढालाई पक्राउ गर्न गएको प्रहरीमाथि गाउँलेले आक्रमण गरेको जिल्ला प्रहरी कार्यालय कालीकोटले जनाएको छ ।
आज (सोमबार) बिहान साढे ६ बजेतिर बुढालाई प्रहरीले हत्कडी लगाएर जिल्ला सदरमुकाम ल्याउने क्रममा स्थानीयले प्रहरीसँगै पीडित महिलाका परिवारमाथि आक्रमण गरेको जिल्ला प्रहरी कार्यालय कालिकोटका निमित्त प्रमुख प्रहरी निरीक्षक शुभराज बमले बताए ।
गाउँलेहरूको आक्रमणबाट इलाका प्रहरी कार्यालय पलाँताका असई लक्ष्मी ढुंगेल रावत र पीडित परिवारका सदस्य धनमान विक घाइते भएका छन् ।’ उनले भने,‘घाइते दुवैको स्थानीय स्वास्थ्य चौकीमा उपचार भइरहेको छ । घाइते विकको अवस्था गम्भीर रहेको छ । घाइते दुवैलाई हेलिकोप्टरमार्फत उद्दारको तयारी भइरहेको छ ।’
बलात्कार आरोपी बुढा हत्कडीसहित फरार भएको उनको खोजीका लागि जिल्ला प्रहरी कार्यालय र नजिकका प्रहरी चौकीबाट थप टोली पलाँता खटाइएको निमित्त प्रहरी प्रमुख बमले बताए । ‘बुढाले २०७९ असोज ३१ गते गाउँकै एक दलित महिलामाथि बलात्कार गरेका आरोप लागेको थियो ।’
उनले भने, ‘पीडित परिवारले कात्तिक ९ गते जिल्ला प्रहरी कार्यालयमा किटानी जाहेरी दिएको थियो । त्यसयता फरार रहेका बुढा घरमा आएको जानकारी पाएपछि सोमबार बिहान ४ बजे उनलाई पक्राउ गर्न चार जना प्रहरी टोली गएको थियो ।
प्रहरी पुग्दा घरमै सुतिरहेका बुढालाई प्रहरीले हत्कडी लगाएर जिल्लातर्फ ल्याउने क्रममा गाउँलेले आक्रमण गरेका हुन् ।’