कतारमा २ सय बढीको नेपालीको निःशुल्क स्वास्थ्य परीक्षण गरिएको छ । गैर आवासीय नेपाली संघ,राष्ट्रिय समन्वय परिषद (एनआरएनए) कतारले आयोजना गरेको कार्यक्रममा २ सय बढीको नेपालीले निःशुल्क स्वास्थ्य परीक्षण गरेको एनआरएनए कतारका प्रवक्ता सन्तोष क्षत्री जानकारी दिए ।
यहाँ रहेका नेपाली दाजुभाइ तथा दिदिबहिनीहरुको लागि लक्षित गरी शुक्रबार एक दिने निःशुल्क स्वास्थ्य परीक्षण कार्यक्रम एसियन मेडिकल सेन्टर वकरामा बिहान ८ देखि सुरु भएर दिनको २ बजेसम्म सञ्चालन भएको थियो ।
स्वास्थ्य परीक्षणमा १५ जना विशेषज्ञ डाक्टरसहितको टिमले स्वास्थ्य परामर्श, ब्लड प्रेसर, सुगर, कोलेस्ट्रोल, इसिजी, युरिक एसिड, बिएमआइ (उचाइ र तौलको अनुपात) लगायतका स्वास्थ्य सेवा रहेको प्रवक्ता क्षत्रीले बताए ।
स्वास्थ्य परीक्षण कार्यक्रममा एनआरएनए आइसिसीका पदाधिकारीहरू सहित नेपाली दूतावासका कार्यवाहक राजदूत लक्ष्मण खनाल, लेबर कन्सुलर कृष्ण खनाल,दूतावासका द्वितीय सचिव प्रवीण भट्टराई लगायतको उपस्थिति रहेको थियो ।
एनआरएनए कतारले यहाँ कार्यरत नेपाली कामदारहरूको स्वास्थ्यलाई मध्यनजर गर्दै विभिन्न समयमा निःशुल्क स्वास्थ्य परीक्षण गर्नुका साथै श्रमिक सचेतना ,महिला स्वास्थ्य समस्या सम्बन्धी सचेतना र रेमिटेन्स तथा बैकिङ्ग साक्षरता सम्बन्धी अभिमुखीकरण लगायतका कार्यक्रम गर्दै आएको छ ।