आफ्नै घरमा कैदी बनेकी पत्नीसँग पतिले तीन वर्षपछि भेट गर्न पाएका छन् ।भारतको महिला आयोगले तीन वर्षपछि उनीहरुको भेट गराउन सफल भएको हो । पतिका अनुसार पत्नीलाई उनकै आमाबुवाले तीनवर्षदेखि घरमा बन्दी बनाएर राखेका थिए ।
महिला आयोगमा उजुरी परेपछि आयोगले तुरुन्त आफ्नो टीम पठाएर पीडित महिलालाई उनको आमाबुवाको घरबाट छुटाएर ल्याएका थिए । उनीहरुको तीन वर्षपहिला नै विवाह भएता पनि युवतीका आमाबुवाले उनीहरुलाई सँगै बस्न नदिएको महिला आयोगकी स्वाती मालिवानले जानकारी दिइन् ।
बिवाहको सबै कागजात भएर पनि उनीहरुलाई सँगै बस्न नदिएपछि महिला आयोगमा पतिले उजुरी गरेका थिए । पत्नीलाई कहिलेकाँही मात्र पतिसँग कुराकानी गर्न दिने गरिएता पनि भेट्न भने रोक लगाइएको थियो । घरमा बुवाआमाले आफूलाई पिट्ने गरेको पीडित युवतीले बताइन् ।
मार्च १३ मा उद्धार गरिएकी युवती अहिले आफ्नो पतिको साथमा खुसीसाथ बस्दै आएकी छन् । उनीहरुको आमाबुवाले अहिले उनीहरुलाई दुःख दिन छाडेका छन् तर पनि सुरक्षाको दृष्टिले महिला आयोगले प्रहरीमा सुरक्षा दिनको लागि निवेदन दिएको भारतीय मिडियाले समाचार लेखेको छ ।