सुदूरपश्चिम प्रदेश सभाको सार्वजनिक लेखा समितिले प्रदेश सरकारको उद्योग पर्यटन वन तथा वातावरण मन्त्रालयले गत आर्थिक बर्षको अल्पकालीन बजेटमा गरेको खर्च बारे सचिवसित छलफल गरेको छ ।
समितिको बिहीबार बसेको बैठकमा मन्त्रालयका सचिव मेघनाथ काफ्लेसित गत आर्थिक बर्षमा भएको अध्ययन तथा अनुसन्धान शिर्षकको खर्च माथि छलफल भएको हो ।
बैठकमा सचिव काफ्लेले प्रदेश भित्र मन्त्रालय अन्तर्गत पर्ने आठ बिषयगत कार्यालय अन्तर्गतको ३५ वटा आयोजनाको सम्भाब्यता अध्ययन गरिएको जानकारी दिनुभयो । सम्भाब्यता अध्ययन शिर्षकममा रहेको २ करोड २५ लाख बजेटमा १ करोड ८१ लाख १२ हजार रुपैया अध्ययनमा खर्च भएको सचिव काफ्लेले लेखा समितिलाई जानकारी दिनुभएको हो ।
गत बर्ष अध्ययन भएका आयोजनामध्ये चालू आर्थिक बर्षमा ४० प्रतिशतमा मात्रै बजेट बिनियोजन भएको उहाँले बताउनुभयो । सम्भाब्यता अधययन गरिएका आयोजनाहरुको अध्ययनमा पारदर्शिता कत्तिको थियो भन्ने कुरामा समेत अध्ययन हुनुपर्ने समितिका सदस्य मान बहादुर धामीले बताउनुभयो । पद्धति बसाउने बेला भएकोले ध्यान पु¥याउनुपर्ने बताउँदै सांसद धामीले देखावटी रुपमा सम्भाब्यता अध्ययन हुने गरेको आरोप लगाउनुभयो ।
समितिका सदस्य अमर साउँदले अध्ययनका नाममा शंकास्पद खर्च हुने प्रवृति देखिएकोले लगानी खेर जाने सम्भावना रहेको बताउनुभयो । समितिका सभापति कुमारी नन्दा बमले मन्त्रालयले उपलब्ध गराएको खर्च बिबरण फेरी अध्ययन गरिने र आवश्यक परे मन्त्रीलाई समेत छलफलका लागि बोलाइने बताउनुभयो ।
मन्त्रालयले प्रदेश सरकारको क्षमता भन्दा माथि रहेका आयोजनामा पनि अध्ययन गरेको देखिएको छ । लेखा समितिमा यी बिषयहरुमा मसिनो रुपमा अध्ययन गरेर निष्कर्षमा पुगिने सभापति बमले बताउनुभयो ।