लागुऔषध ब्राउनसुगरसहित पक्राउ परेका चर्चित र्यापर आशिष राना अर्थात् लाउरेलाई आठ दिन थुनामा राख्न जिल्ला अदालतले स्वीकृति दिएको छ । लाउरेसँगै पक्राउ परेका चारलाई थप अनुसन्धानका लागि थप आठ दिन थुनामा राख्न अदालतले स्वीकृति दिएको हो ।
जिल्ला प्रहरी कार्यालय कास्कीले लाउरेसहित थुनामा रहेकाहरूमाथिको अनुसन्धान नसकिएकाले थप थुनामा राख्न अदालतसमक्ष शुक्रबार म्याद मागेको थियो । कास्की जिल्ला अदालतले आगामी शुक्रबारसम्म थुनामा राखी अनुसन्धान गर्न स्वीकृति दिएको जिल्ला प्रहरी प्रवक्ता सुन्दर तिवारीले जानकारी दिए । पोखरा महानगरपालिका– ९ नयाँबजार बस्ने लाहुरे र अन्यलाई प्रहरीले गत बुधबार साँझ ७ बजे पोखरा– ८ स्थित जाल्पारोडबाट पक्राउ गरेको हो ।
लागुऔषध ब्राउनसुगर सेवन गर्दै गर्दा लाउरेसहित चारजनालाई प्रहरीले नियन्त्रणमा लिएको थियो । पक्राउ पर्ने अन्यमा पोखरा– २१ घर भई हाल पोखरा– १७ छोरेपाटन बस्ने ३९ वर्षीय ध्रुवबहादुर थापा, रुपा गाउँपालिका– ७ घर भई पोखरा– १ बगर बस्ने ३० वर्षीय बिक्की भन्ने नवीनकुमार गुरुङ र स्याङ्जा भिरकोट नगरपालिका– ६ घर भई पोखरा– ८ सभागृह बस्ने २२ वर्षीया सुस्मिता गुरुङ छिन् । पक्राउलगत्तै खानतलासी गर्दा बिक्कीको साथबाट ०.५१ ग्राम र सुस्मिताको कोठाबाट १२.५० ग्राम ब्राउनसुगर बरामद गरिएको प्रहरीले जनाएको छ । प्रहरीले उनीहरूबाट डिजटल तराजु पनि बरामद गरेको छ ।