नेपाली राष्ट्रिय महिला क्रिकेट टोलीकी कप्तान रुबिना क्षेत्रीले थाइल्याण्ड वुमन ट्वान्टी–२० स्म्यासको उपाधि जित्न नसके पनि प्रतियोगिताबाट धेरै कुरा सिक्न पाइएको बताएकी छन् ।
“विश्वकप छनोटअघि भएको यस प्रतियोगिताबाट आफ्ना कमिकमजोरी औल्याउने मौका मिलेको छ,” शुक्रबार थाइल्यान्डबाट स्वेदश फर्किने क्रममा रुबिनाले त्रिभुवन अन्तर्राष्ट्रिय विमानस्थलमा भनिन्, “समूह चरणका खेलमा जित निकाल्न सहज भयो ।
तर फाइनलमा आयोजक थाइल्याण्डविरुद्ध खेलाडीहरु मानसिक रुपमा कमजोर हुँदा विजयी नतिजा निकाल्न सकेनौं । हार र जितभन्दा पनि यो प्रतियोगिताबाट अन्य टोलीलाई जाँचेर आफ्ना कमजोरी सुधार्ने मौका पाएका छौं ।”
छोटो समयको तयारीका बाबजुद नेपाली खेलाडीले थाइल्यान्डमा उत्कृष्ट प्रदर्शन गरेको कप्तान रुबिनाले बताइन् । प्रशिक्षक विनोद दासले पनि लामो समयपछि मैदान फर्किएका खेलाडीको प्रदर्शनबाट आफू सन्तुष्ट रहेको बताए ।
“हामीले धेरै नै सुधार गर्नुपर्ने छ । अब विश्वकप छनोटमा कमजोरी नदोहोर्याउने लक्ष्यसहित तयारी थाल्नेछौं,” प्रशिक्षक दासले भने, “यो प्रतियोगिताले हाम्रो स्तर पत्ता लगाउने मौका दिएको छ ।
अब त्यहाँ भएका कमजोरी सुधार्नु मुख्य चुनौती हो । मलाई आशा छ, बाँकी रहेको समयमा कमजोरी सुधार गरेर विश्पकप छनोट प्रतियोगिता खेल्नेछौं ।”
तीन साताको अभ्यासपछि थाइल्याण्ड गएको नेपाली टोलीले समूह चरण र सेमिफाइनलमा सहज नजिता निकाले पनि फाइनलमा आयोजक थाइल्याण्डसँग ७० रनले पराजित भएको थियो ।
फेब्रुअरी १८ बाट थाइल्यान्डमै हुने ट्वान्टी–२० विश्वकप छनोट प्रतियोगितामा नेपालले चीन, हङकङ, कुवेत, मलेसिया, युनाइटेड अरब इमिरेट्स (युएई) र थाइल्यान्डसँग राउन्ड रोविन लिगमा प्रतिस्पर्धा गर्नेछ।
फागुनमा हुने आईसीसी ट्वान्टी–२० विश्वकप छनोट प्रतियोगिताको तयारीस्वरुप थाइल्याण्डले आयोजना गरेको स्म्यासमा १० टोली सहभागी भएका थिए ।