धनगढी : काम नगर्ने कैलालीका १५ जना ठेकेदारको सुची तयार पारि गृह मन्त्रालयमा पठाईएको छ ।
२० योजनाको ठेक्का लिएर काम समयमै सम्पन्न नगर्ने जिल्लाका १५ जना ठेकेदारको नाम गृह मन्त्रालयलाई पठाएको प्रमुख जिल्ला अधिकारी ऋषिराम तिवारीले बताए ।
सडक डिभिजन कार्यालय, जिल्ला प्राविधिक कार्यालय, खानेपानी तथा सरसफाई डिभिजन कार्यालय, शहरी विकाश तथा भवन निर्माण विभाग डिभिजन कार्यालय, मेडिकल कलेज पूर्वाधार निर्माण विकाश समिति समिति र हुलाकी राजमार्ग कार्यालय मार्फत ठेक्का लिएर सम्झौता मितिमा काम सम्पन्न नगर्ने ठेकेदारको नाम सकलन गरि गृह मन्त्रालयमा पठाईएको हो ।
योजनाको अनुगमन तथा सम्बन्धित कार्यालयमा तथ्याङक सकलन गरेर ठेकेदारको सुची तयार गरिएको प्रमुख जिल्ला अधिकारी तिवारीले बताए ।
गृह मन्त्री राम बहादुर थापा बादलको निर्देशनमा गृह मन्त्रालयले एकहप्ता अघि ठेक्का लिएर काम नगर्ने ठेकेदारको सुची तयार पारि पठाउन प्रशासन कार्यालयलाई निर्देशन दिएको थियो ।
‘गृह मन्त्रालयको निर्देशन अनुसार हामीले जिल्लाका विकाश निर्माणका योजनामा ढिलाई गर्ने ठेकेदार र योजनाको नाम पठाईदिएका छौ ।’ तिवारीले भने, ‘केन्द्रकै आदेश अनुसार ति ठेकेदारमाथि कारवाही अगाढी बढाउछु ।’