सरकारले भारतसहित विभिन्न मुलुकमा रहेका नागरिक स्वदेश ल्याउने गृहकार्य सुरु गरेको छ । भारतको सीमावर्ती इलाका अड्किएका नेपाली भने स्वदेश आउने क्रम सुरु भइसकेको छ ।
शुक्रबार बसेको कोरोना सङ्क्रमण रोकथाम तथा नियन्त्रण उच्चस्तरीय समन्वय समितिको बैठकले तत्काल फर्कनुपर्ने नागरिकको पहिचान गर्न र सूची तयार गर्न दश दिनको समय तोकेको छ । परराष्ट्रमन्त्रालयले भारतसहित विभिन्ने तेस्रो मुलुकमा रहेका र जरुरी कामले स्वदेश फर्कनुपर्ने अवस्थामा रहेका नागरिकको पहिचान सूचीकरण गर्ने छ ।
“परराष्ट्र मन्त्रालयलाई दश दिनभित्र फर्कनुपर्ने नागरिकको सूची तयार गर्न जिम्मा दिएको छ,” बैठकपछि समितिका रहेका एक मन्त्रीले भने ।
सरकारलेले पहिलो चरणमा विदेशमा उपचार गर्न गएका, विदेशमा रोकिएर काजकिरिया गर्न नपाएका, कार्यक्षेत्रबाट निकालिएर अलपत्र हालतमा रहेका नागरिकलाई प्राथमिकतामा राखेको छ ।
विभिन्न देशमा रहेका त्यस्ता नागरिकको सूची तयार पार्ने जिम्मा परराष्टर्ले लिएको र दश दिनभित्र पहिचान र सूचीकृत गरिसक्ने ती मन्त्रीले बताए ।
मन्त्रिपरिषद् बैठकले बनाएको कार्यविधिअनुसार केही होटल, रेस्टुराँलाई पनि क्वारेन्टाइन स्थल बनाइने छ । त्यसको जिम्मा संस्कृति पर्यटन तथा नागरिक उड्डयन मन्त्रालयलाई जिम्मा दिइएको छ ।